خبر حكومي وتعليق شعبي:

سعوديون يحبون وطنهم وحكومتهم!

الخبر الحكومي:

فاز شاب صيني يُدعى (وان هوا) وزوجته بتذكرتي سفر ذهاباً وإياباً إلى السعودية، لقضاء شهر العسل. وكان الجناح السعودي في معرض أكسبو شانغهاي 2010، قد استقبل الزائر رقم مليون، وهو شاب صيني، الذي تفاجأ وسط دهشة كبيرة منه باصطحابه من قبل مدير الجناح السعودي المهندس عبد الحميد حسن إلى المنصة، حيث قدمت فرقة الفنون الشعبية عرضاً خاصاً لتهنئته. وكانت جائزة (وان) وزوجته عبارة عن تذكرتي سفر ذهاباً وإياباً إلى السعودية مقدمة من مجموعة الطيار للسفر لرحلة مدتها أسبوع واحد يقضيها في ربوع السعودية. ويعمل (وان) معلما للحاسب الآلي في مدرسةٍ متوسطةٍ بمدينة شنغهاي، وقال: (تزوجتُ منذ فترة قصيرة وسوف أقضي شهر العسل في السعودية).

التعليق الشعبي:

(1) يا (وان هوا) وين تبي تروح بالسعودية؟ تعال الرياض وذق طعم الحرّ يجنّن مرّة مرّة، راح يعجبك! انتبه تجيب (لابتوب) حقك، تراه بيحترق من الحرّ. شنق بنق مونق هنق!

(2) حيّاك! ترا عندنا أمطار وجو زين يصلح لقضاء شهر العسل، وأسعار رخيصة للسياحة الداخلية! صدقني بتلعن حظّك اللي خلّا رقمك مليون!

(3) أساساً أول ما بينزل في مطاراتنا الحلوة، بيكتفي بهالقدر، وبيرجع بلده!

(4) يا (وان هوا) أقسم بالله أنك أحظظ (أكثر رجل محظوظ) رجال أنت ومرتك (زوجتك). المهم إبعدْ عن الطائف وأبها والباحة، ترى الشقق فيها أرخص شي بألف ريال، لكن أمانة، إن رجعت الى الصين، فاسترْ على ما واجهت، ولا تعلّم أحداً (أي لا تبلغ أحداً بما رأيت)!

(5) شكل وان هوا غضيب والديه (أي أغضب والديه)! الله يستر علينا! داعية عليه أمّه! قالت له: روح الله يوديك السعودية ياوان هوا، يا ولد بطني، مثل ما انت مزعلني!

(6) يا قرادة حظّك (يا لتعس حظك!) أنت وهالمرة المسكينة!! أقول بع التذاكر أحسن لك ولنا!

(7) الله يحييك يا أبو (هوا)! وياليت تقضي عطلة سعيدة في جدة وشوارعها المكسّرة!

(8) يا أخي بعض الناس حظّها زي الزفت؛ أو شكله حظ المقرودة اللي توّه ماخذها (أي تزوجها حديثاً).. أجل بتقضي شهر العسل هاه؟ يا هو بينشوي ذا الأفطس، وبتطلع عيونه من الحرّ، هو وإياها.. لا والذهاب والعودة على الخطوط السعودية! تعذيب من جدّ.. والله يا (وان هوا) أن تاكل هوا!

(9) راسلينك عندنا! انتبه! الحكومة الصينية تبي تتخلص منك!

(10) اووووم، حظّك أغبر، صدقني! هوا هوا كلكووم تجمعتوو! سوا سوا! يامدام وياوان هوا: لا والله اللي بتاكلووون....

(11) ماتدرون وش السالفه! السالفه ياجماعة الخير، انهم راحوا للسعودية علشان الكبسة السعودية، يبون يتعلمون كيف الطبخ!

(12) حاول تحجز بدري ياوان هوا! ترى رئيس هيئة السياحة عندنا (الامير سلطان بن سلمان!!) سبق وحجز وقالوا له: فلّ! ما في مقاعد!

(13) ليه يا جماعة الخير تعقّدون الرجّال، وهو بعد ما أخذ التذكرة! لازم تمدحون الوجوه السمحة في المطار أوّل ما ينزل من الطيارة؛ وأقول للصيني: جيب معاك (جاكيت).

(14) وش سويت (ماذا عملت!) يا وان هوا بحايتك، عشان أحد يدعي عليك؟ مصدّقٌ أنت ووجهك بالسياحة؟! لا وشهر عسل يالأهبل!

(15) مسكين! الله يكون بعونه على الحر والغثا والزحمة اللي تجيب المرض. بيجي يشوف وين وصلنا من التخلف؛ وهم وين وصلوا من التطور. أجل غمرته السعادة!! يا هو بيندم ثاني يوم يوصل!

(16) يا حسرة... وش يجي له بهالحر؟ والله ان ينسلخ جلده! يا حليلكم والله.. أجل فاز بتذكرة سفر لمدة أسبوع! يقضيها في ربوع المملكة! يجي يتفرج على حفريات الرياض، أو مجاري جدة!

(17) يا انه بينصدم بشمس تسيّح المخ! يانه بيشوف الشمس على حقيقتها! وبيشوف البطحاء أكبر تجمّع للمتخلفين في العالم والمسجل في كتاب غينيس.. ولا ننسى أحدث شبكة قطارات، وأسرع قطار، ولا ننسى اتوبيسات المترو (خط البلدة) والحفريات الضخمة، وعتيقة، ومروراً بحراج بن قاسم! يالهوي! باختصار سوف يعشق السياحة!

(18) عز الله فاز بالشلوطه! بالله اخروها شوي له، لين يهجع الوهج.. والا سيكره اليوم الذي زار فيه الجناح السعودي. تلقاهم ما أمداهم يفتحون خمس دقائق، إلا ووصل المليون ههه!

(19) اجل غمرته السعادة هو وزوجته عشان بيجلس عندنا اسبوع باللهيب والنار! ولا من المناظر الخلابة! ولا جيبوه للمملكة والفيصلية! وربي خبر يضحك: (غمرته السعادة)! والله ان يغدي مثل الضبّان!

(20) الله يعينه صراحة! اسبوووع وبالسعوديه؟! لا حول ولا قوة الا بالله!!

الصفحة السابقة